من وحى رقة احساسك

نفسي أعرف ايديكي شكلها ايه؟

عينيكي بتحزن امتى وازاي وليه؟
وبترقص من الفرحه لما يحصل ايه؟
نفسي أعرف بتحبي تاكلي فين وايه؟
بتحبي تشوفي ايه؟وتسمعي ايه؟ وتلعبي بايه؟
ياترى بيتك شكله ايه؟
وشباكك بيطل على ايه؟
يتسهري امتى وقبل ما تنامي بتحلمي ايه؟
نفسي ادوق رنه صوتك ونفسي اشوف كلامك بيرقص باليه
أصحابك كتير ؟ قليل؟ ولا يادوب هوه مج النسكافيه
نفسي أغيظك شويه عشان أتفرج على عنيكي تقول لي يا ابن الايه
نفسي أغني لك انتي بس انتي عايزه اغنيه ايه؟
ولا يمكن صوتي يبعدك طب تطلبي مني ايه؟
نفسي أعرف خطوط كفك بترسم شكل ايه؟
نفسي أعرف رموش عينيكي بيكلموا بعض بلغه ايه؟
نفسي أشوف أودتك ومرايتك، ياترى مخدتك قد ايه؟
بتغيبي امتى؟ وبتروحي فين؟ وحاسه دلوقتي بايه؟
فرحانه ولا زعلانه؟ وموبايلك عليه نغمات ايه؟
بتحبي البحر؟، و لابتحبي المنظر مع اكلة سمك فيليه؟
لعبتي زمان في الرمل، و لسه بتبني قصور أحلام عليه؟
اسمك مين اختاره ؟ بابا ولا ماما وكان ليه؟
مين بيدلعك؟ولا كان ؟ طب ادلعك انا باسم ايه؟
مين بيضايقك؟ايه شاغللك؟ مين بيعاكسك؟ قولليلي بس عليه؟
نفسي اعرف ليه شعرك بيطير الفراش فرحان حواليه؟
نفسي أعرف طريقة مشيك؟وفصوص خواتمك بتضحك ليه؟
نفسي اعرف لون شنطتك؟وسكوتك علامة ايه؟
نفسي أصور تنهيدك،لما يهف النسيم عليه
نفسي اسمع لمستك،ودفا همسك حواليه
كلامي ده من غير قصد،شعوري بينده عليه
وفرحان كده وراضي ومش مستني الرد،احساسي انا
من غير ليه
بقلم حسام نو الدين
منقووووووووووووووووووووووووووول