آآآه ...يا بلد !!

موضوع: آآآه ...يا بلد !! الأحد أغسطس 05, 2007 8:35 pm

... بما انكم اختارتونى انا عشان اقول العنوان ..فانا هاخلى الموضوع زجل علشان يكون لذيذ ..لكن بعد كده هانخليها فصحى ..وبالمناسبة ..انا اتحدى اى حد فى الفصحى

نبدا مع بعض يلا ...
آه ...يا بلد
[/size]اه يا بلد ..عاوزة ولد ..
يكون شجاع ويكون اسد ..
واللهى يابا فى دنيتى
مش راح الاقى غيرك سند !!
لميت عزالى فى شنطتى ..
وايمانى بالله المدد ..
وكتمت خوفى فى مهجتى ..
كلمت نفسى فى وحدتى ..
وكلام جديد منى اتولد ..
قنديلى نوره بينطفى ..
حروفى لونها بيرتعد!!!
قلمى شجاعته بتختفى !!
فين الرصاص؟! ..فين الهدد ؟؟!!
الناس وحوش ماتختشى ..
وجلود قدرها تتجلد !!
بدم الفقير بتنتشى ..
ورصاص نميمة .. ونار حسد !!

يلا فرجونى بقى مستنى تكملتكم ورونى الحرب !!!

حلو يا احمد شعرك ومعبر وانا ارد علية ببعض الكلمات

[b

راح الولد خد شنططة

وهجر البلد

مالقاش سند يكون قوى
مالقاش أمان هنا فى البلد
شايف وشوش متلونة
قلبة اتنفض كلة ارتجف
عايش فى غابة فيها ديابة
كثير وشوش من صدة

وكانها فريسة صياد
بينهشوا فى قلوب الناس
مسح دموعه واخذ القلم
كتب يا فارس حرر بلد
وقام وصلاة ركعتين
وقال لية رب اسم كريم
واخذ معاة شنططة
وبأعلى صوتة نادا صرخ
مش معاكم هتكون
نهايت قصتى
وسافر الولد

[/b]

يالة اللى بعدى يبداء

اه يا بلد و الاسم كان محروسة

ينخر فى جسمك الف سوسة و سوسة

بلد زراعى انتاجه عال العال

اكتر ما فيكى القرع ويا الكوسة

اه يا بلد و اه تانية اه و اهين

فين اهل بلدى الكمل الحلوين

فينك يا سعد ؟ يا مصطفى كامل

فين الشهامة و النخوة راحو فين

اه يا بلد سامحينى مش ناسى

طينك و خيرك و عزوتى و ناسى

انا مهما رحت و الله مهما جيت

ابنك و ابدا ماكون فى يوم قاسى

مهموم و همى ينصلح حالك

مهموم و نفسى اتباهى بجمالك

لازم تعودى لازم ترجعى بهية

زى ما زيكو ياما غنالك

الله الله يا نور يا أحمد الملا اية دة كلة

بجد جميلة حتى فى الشعر مش ناسى انك مهندس زراعى

أحمد الملا انت بتنادى على الولد لازم يرجع البلد بكرة يكون رجع انت واحمد زكريا
واحمد الملا ترجعوة الولد انتم السبب فى هروبوة طفش منكم
ههههههههههههههههه

بجد جميل جدا الكوكتيل دة سلمت قلمك أنا بقة انسحب ارفع الراية البيضاء

صحيح وفين نسرين مذكرتنيش لية فى الشعر زكرت زيكو بس

اه يا بلد ..عشقى ونور عينى ..
ولون ترابك تاج على جبينى ..
ومهما اسيبك ..بشوق تنادينى ..
ولما احلم الاقى غنا وردك ..
يطربنى وافضل اشجيه ويشجينى ..

اه يابلد ..وسط العطور ..عنبر ..
والطير بيعلا فى سماكى يتغندر ..
والخيل بيرقص ..عمال بيتمختر..
والفاكهة فوق الشجر فينها وفين ضايعة ..
طبعا مالازم قى ثانية تتكمر ..

وقالولى عنبك وسط العنب لولى ..
يقول يا موز ويا منجة غنولى ..
انا والله مابعد واقول تعدولى ..
اصلى حياتى هنا...فاهمانى يا بلدى ؟
ياللى فى طينك .. انسابى واصولى

اه يا بلد و الاه دى والله عليكى

اه يا بلد خيرك يروح مش ليكى

اه يا بلد مكتوب عليها تعيش

وحاميكى هو اللى ..(؟).. فيكى

اه يا بلد مش لاقى و الله كلام

زى اللى قاله شاعر يوم من الايام

بلدى و لو بهدلتنى عزيزة

و اهلى و لو كحرتونى كرام

اه ع الولد نسرين تنادى عليه

و زيكو وسط العنب يكتب و يوصف فيه

بين الولد و العنب عمال انا احكى

مفيش حد غيرنا يحكى ولا ايه ؟

اه يا بلد ..واهات تقول ولدى ..

ليه سيبتنى والدمعة على خدى؟؟! ..

ولمين تسيب الارض؟؟ ومين هايحميها؟؟

ومين هايكتب عالسما مجدى ..

يابنى البعاد احضانه غدارة ..

لاتلاقى صاحب ..ولا جار ولا جارة ...

والعيش فى وسط الاهل دا احلى لقمة عيش ..

لوحتى تاكل فول ...وتحلى ببصارة !!

اياك ياملا تزوغ ..تلهث ورا قرشين..

طول عمرنا ويا الجنيه عايشين !!

ولا مرة قولنا دولار حتى ولا يورو..

والين يا بلدى ..مابقاش يجيب رغيفين!!

يابنى الحياة فى الغربة ديه قارب ..

تفضل فى وسط الموج تعانى وتحارب ..

والناس بتبقى قروش وحيتان بلا رحمة..

ياتكون اسد غدار ..او فار لتجارب ..

اه يا بلد ... بارده عليكى العين

يشقى حماده فيكى سنين بعد سنين

يكبر خيرك .. ولسه أنا طيرك

تسيبيه يجوع .. وتأكلى النايمين

اه يا بلد .. خيرك يملى عين الملا

أنهار جنات قصور وكل ما يتمنى

يجى الحرامى يشفط كل حاجة

ويرجع يقول سامحنى .. كنت باتسلى

هو لسه ما صفرش affraid

أة يا بلد
رجع الولد راكب حصانة
شايل فى ايدة سيفة فى دراعة
راجع يعمر يهدم ويبنى
ينشأ يأسس راجع بقوة
فارس فى ساحتة
فى ايدة فاس عمال بيزرع
عرقة على الارض نازل بيروى
حاصد ومش فانى راجع ومش راحل
واقف فى ايدة سلاحة فى دراعه
هيفدى بروحة عشان وطنة
وبدمة حايكتب بشهدة ضمير النخوة مش نايم
دة صاحى ووقف يتحدى
وارفع هنا علم وطنى واغنى واقول يا بلدى
دة من نيلها أنا شارب
وحاكتب بايدى على السبورة
انشأ جيل يكون صالح على الاخلاق والحكمة
ماسك فى ايدى قلم من قوة
بكتب بصدق ومش خايف
بكتب بكل حرية وحارب كل اعدائى
حتى لو التمن غالى
بقلمى صوتى يوصلك
بقلمى احارب الطغيان
ولو حطوا الحديد بين ايدى
ولو هجرونى كل الناس
انا راجع بشكل جديد ومش راحل

اشكر الجميع على هذة المشاركة والحماس الجميل منكم لوطنكم
بس كنت عايزة اقول عارفين لية الولد رحل لما لقى الظلم والفساد انتشر
قرر يهاجر يمكن يحقق ذاتة ورجع احمد الملا ومحمد البسيونى واحمد زكريا
عمل منادة وقال لو كل واحد شال ايدة وقال انا مالى مش هنلقى حد يقول لا يدافع عن وطنة

بس الولد رجع لية رجع اقوى عارفين لية حس بطعم الغربة شاف الذل والاهانة عرف قيمت بلدة وناسها الطيبة رجع وقال بلدى اولة بكل نقطة عرق فيها

ياريت الكل يشارك من الاعضاء حتى لو مش بيكتبوة شعر يعبروة برايهم لانها ديت قضية للمناقشة

متشكرين قوى ياجماعة علي مجموعة الشعر الجميلة دى وحمد الله على سلامة الولد ...

آه يا بلد ..يام الرغيف مسخوط !!..

والماتش لما ..بقى ثانيتين فى الشوط ..

مش عارف القى شغل ..فضفضت مع بحرك ..

قالى تعالى ..اشغلك قرموط !!

أه يا بلد والاسم كان طيبة ..

والناس بقت للهم..شريبة ..

واما لقيت الضحك فارق شفتى ..

خليت (عماشة ) ...يعملى تركيبة

ولمين اروح غير ك..ياعزوتى وناسى ..

شايف مرار..لكنى مش ناسى ..

دانا والله مهما انضرب واخد على قفايا ...

شايل جميلك فوق على راسى ..

اه يا عروسة يام العيون السود ..

مربوط فى ساقية ..ومن قلبى انا مشدود ..

وحلمى ياما فى يوم حصاد خيرك..

القاه سليم ..من نهش جيش الدود ..

اه يا بلد لا شربت انا و لا اكلت

و مهما رحت و جيت طلعت ولا نزلت

يا ابن ادم بتضحك ليه عليا

و تقول انا اللى جبتلك اسفلت

عشمنى بالحلق قطعت له ودانى

و قلت ما تغلى عليك خدها علشانى

و لما جانى الحلق جرى عليا و قال :

و ادى الهدية يا عم ... لقيتها انا ودانى

اسمع يا صاحبى كلمة حكمة تمام

لا تمشى ورا اللى يبيع فى كلام

كلامه احلى من العسل و الشهد

يبيع لنا فى الوهم و يتاجر بالاحلام

آه يا بلد ..شقيان ولا دارى ..
ولا لاقى غير نيلك ..اشكيله اسرارى ..
ولما اكون ...مش لاقى لقماية ..
بطمع لجوعى ... فى أكل صرصارى ..

وحلفت والله يا غالية ..ماخلفش يوم وعدك ..
ولا اقول هاجيب لودر ..وارصف انا ارضك ...
ولما تقع الفاس ..اجرى واسيب ناسى ..
واقول انا ماشى ..والطوب اهو عندك !!

بعشق صفا سماكى ..وشوى سماكى ..
بشم دخانه وانا.. واقف فى شباكى ..
ولما احب فى يوم ..اخدلى لو سمكة ..
اقول للقطة جيبيلى...عضماية وياكى ..

بكتب بحرية ..وروحى عربية ..
ولا عمرى راح انافق ولا اخون صديق ليا ..
ولا اقول يا نور عينى .. حطينى عالكرسى ..
وشوفى والله هاقوم .. وافديكى بعنيا !!

آه يا بلدى كتير عيشنلك
يبنوا ويبنوا فى قلوبهم شيلنلك
حب كبير لكن مكبوت
غيرنا بيحرق وكلامه مش مظبوط
اعمر واكبر وانمى وشجر
ارجع من تانى م الاول أكرر
ليه دايما غيرنا يكتب ويكتب
كلام زى العسل لو دوقته تلقاه
تورتة محشية
ولا جوز ولا لوز لكن ملوخية
ارحم يا كابنت وسيبنا نحكى
غيرنى بيعلى ويعلى ويعلا
قالى كلمة حلوة عجبتنى
نافق واضحك تبقى سيدنا
نعملك مقام ونصلى ونقيدلك
شموع على قبرك زى اللى قبلك
ارحم يا كابتن وسيبنا نعلا
نفسى فى مرة اعلى ولو مرة
ليه كل منقول لا ونتناقش
تقولولنا كويس وتاخدونا على بره
نفى أو سجن أو حتى أحداث
أى تهمة علشان يصدقوها الناس
سيبنى اعبر سيبنى اكمل
مشوارى كبير ولوحدى هاتحمل
سيبنى اقول لا للكلام
اللى مش عجبنى للكذب والأوهام
يقولولنا دايما كلمة كويسة
من حقك ان تقول ما تريد
ومن حقنا نحبسك ونعتقلك من كلام
سيبنا يا عم يسبنا يا كابتن
احنا بنوطى وغيرنا بيتقدم
ليكى يا بلدى هاصبر واصبر
وبرده عارف مين الىل هينصر
رب العباد هو الجبار
نسيبهم له يشويهم فى النار
أحمد وزيكو قالو كلام
وكمان نسرين وبنرفض الأوهام
يلا يا كابتن ياللى بعديا
كمل كلامنا مهى دورية

اه يا بلد دخنا ف مراجيحك

الاسم ولادك و الفعل مجاريحك

لا نطاطى يوم و لا نبيع روحنا

و لا احنا قراميط تاكلنا تماسيحك

كتر الكلام و الكل قال قوالة

و الدور على الفعل طبعا يا رجالة

عمر الكلام لوحده ما هيقدر

انه يغير شئ فى دنيا او حالة

ايدكم فى ايدى نخلى بكرة جميل

و نغنى للشمس و للنسيم و الليل

و القمرة و النجمة و الصحبة و اللمة

و هو ده طريقنا و طريقنا ده طويل

منتدى و جينا و لا حد بينا دارى

كتبنا احلامنا و لا شئ هنا ندارى

بقلمك يا زيكو و نسرين هنا و بارو

و الملا بيمسى ... فينك يا بندارى

انا قولت اهات كتير لكنى برده سعيد ..
بصحبة احبابنا ..والصحبة والله عيد ..
والناس حواليا اهلى ماليش غيرهم ..
دانا والله لو اسيبكم ..هاعيش حياتى وحيد ..

وبصحبة الملا ..زجال ومش وراحم ..
نسرين باقلامها وكلامها بتساهم..
ويابارو نورنى وادخل وقول شعرك..
وشيرين اهى بردو ..عمالة بتزاحم ..

وان قولت يا ادمن ..والله لميتنا ..
انا راح خلاص ادمن ..واشتاق لقعدتنا ..
وعادتنا ..ايد على ايد ..نعلى ونطور ..
مش محتاجين عواميد.. لوحدنا ننور ..

وعمرو عبدالله ..يا منور الكواليس..
اوعاك نشوف عرضك ..مانلاقى غير كوابيس !!
داحنا عشمنا كبير ...نشوف حاجة تشرف..
وسيب عليا الامن ...وهاعرض الترابيس ..

أنا أسمى مكتوب أة لقيتة ههههههههه

بجد أنا دخلت التاريخ مش عارفةى اشكركم ازاى انتظروة منى شعر

جيالكم مش خالص الولد رجع فى اية تانى يالة اعملوة شعر جديد

اة يا بلد
بلد الوسايط والمحسوبية
والعيش معجون بعود كبريت
على كام دقيق قمح مسرطن
وكل وقول احمد ربك
شبابك سهرانة على القهوة
على كام قمار على كام شيشة
ماهو كل ضرب الهوة ديكوة
مفيش شغلانة بتعريفة
بقة كل الناس سواسية
يا عالى قوى يا بنطاطى
دة مبقش حتى فيها رمادى
المية بتساوى برايزة
الناس غلابة ومحتاجة
حتى كمان البرشامة رفعوها للدور العالى
ورغم دة كلة وشايلينك مقامك فوق على راسا
زى ما زيكو غنالك والملا اتغزل فيكى
جميلك لسة على راسى