كرسى الاعتراف

فكرة الموضوع ممكن تكون قديمه او شوفتوها قبل كده

بس فضلت لان فيه اخوة جداد انضمو الينا انها تتجدد علشان نقدر نتعرف ببعض اكتر فاكتروفي نفس الوقت نعرف راي اخوانتا في أي مشكله او قضيه ممكن تطرحوها في اسئلتكو

الفكرة ببساطه
هي اننا هانختار عضواو مشرف مننا هاتوجه ليه الاسئله من باقي الاعضاء لمده يومين
وعلي العضو الجالس علي كرسي الاعتراف ترشيح من سيليه في الجلوس علي الكرسي وهكذا

اتمني تكون فكرتي وصلت اليكم بوضوح وان تنول اعجابكم

شروط :
1\للعضو الجالس علي كرسي الاعتراف تقبل الاسئله والاجابه عنها بكل صراحه

2\لباقي الاعضاء الموجهين للاسئله:ارجو ان نبتعد باسئلتنا عن النواحي الشديدة الخصوصيه ومحاوله توجيه اسئله تبين راي الجالس علي كرسي الاعتراف في مشاكل معينه وحاولو الابتعاد عن وضع الاسئله المكررة من باقي اخوانكم

3\لكل عضو الحق في سؤال خمس اسئله فقط تجنبا للشعور بالملل

ودلوقتي

اولي الاعضاء الجالسين علي كرسي الاعتراف هو Medhat

واول سؤال منى
س1 ليه اشتركت فى المنتدى؟

أشتركت فى المنتدى لاسباب كتير رغم انى مش عضو فى المركز
المنتديات فيها أجد كل شى من ترفية او موضوعات مفيدة او برامج او معلومات
أتعرف على أراء الناس أشوف الناس بتفكر ازاى بحاول انصح لو شوفت حاجة غلط
بحب جدا التفاعل مع الناس من غير ماحد يزعل منى او ازعل من حد
وببقى سعيد جدا لو عملت شى يفيد مع ان موضوعاتى قليلة بس بحاول اخليها مفيدة الى حد ما
اتمنى أكون ضيف خفيف عليكم

طبعا ده سبب مقنع جدا
وانا بشكرك على تفاعلك فى اللعبه

تعمل ايه يا اخ مدحت لو انت مع واحد صحبك وعزمتة فى مطعم كبير وبعد ما خلصت اتضح ان مش معاك فلوس وصحبك مش عامل حسابة

أخلية هو رهن واروح اتصرف فى فلوس او اتصل بالموبايل باى حد ينقذنى

ياترى لو شوفت منظر مش كويس فى الشارع ممكن تعمل ايه ؟

اية نوع المنظر بالضبط عشان الاجابة تبقى دقيقة عمتا لو المنظر هو اعتداء غصب طبعا اتدخل لو مش غصب ولا يمسنى فى وجودى فى المكان لا اتدخل

شكرا على الاجابه

ها نقترح مين يدخل ياترى ياهل ترى؟؟؟؟؟؟؟؟؟
حد يساعدنى ويسمعنى صوته

انا عايز اتسأل

وانا كمان بقول انك تتحط على الكرسى
عايزين صوت كمان

موافق انه يتسئل EMINEM

ياترى ياامنيم بتكره نفسك ؟

لا طبعا الحمد لله انا مش بكرها ولا بجبها اوى انا بحب روحى علشان فيها حاجات كويسة

ها مين هيسال ولا اسال انا تانى

اى حد اسألى انتى او اى حد

امته بكيت وليه ؟

ايه السؤال ده!! بصى انا بكيت فى مرة كنت قاعد لوحدى بليل فى البلاكونة ووكنت بسمع اغانى والادان اذن ولاقيت نفسى كنت ناسى ربنا اوى فى الفترة دى الصراحة مقدرتش امسك نفسى من العياط وحسيت ساعتها انى انسان ميستاهلش نعمة انه يكون مسلم

ها ياجماعه عايزين نختار عضو تانى يتسال

انا انا انا
انا عاوزه اتسال

هههههههههههههههههه اوك يا دودة هسألك انا

ايه اكتر موقف خلاكى تبكى ومش قادرة تقولى لحد بتبكى ليه؟

ايه الاسئله دي
هيا حصلت كذا مره الصراحه بس عاده اللي بيسالني ببكي ليه بيكون امي
ودي مقدرش مقولهاش دي مامتي حبيبتي
واحده من المرات دي كنت ببكي علشان مستوايا في الفيزيا مكنش عاجبني
ومكنتش عاوزه اقولها علشان متزعلش وتتدايق
بسسسسسسس
ها اساله تانيه ؟

اية الاشياء اللى مش بتحبيها فى المنتدى او فى الحياة عموما

في المنتدي مبحبش الخمول الكتير دا
والتفاف البعض حو ل اشياء تافهه
لا بتفيد المنتدي ولا حتي بتفيدهم شخصيا

اما في الحياه
فاكتر حاجه تنرفزني وتجيبلي شلل هيا الظلم
اني اشوف اي نوع من انواع الظلم
وكمااااااااان في الكذب
اللي هوا بردو نوع من انواع ظلم النفس والغير كمان
وبردو كمان ضعف الشخصيه
بجد بكره اشو ف اي انسان ضعيف الشخصيه
علي اد ما بيصعب عليا بصراحه
علي اد مبتغاظ منو وابئي عاوزه اولع فيه

هااااااااااااا
اسئله تاني؟
انا في الخدمه

طيب واية الموضوعات اللى بتقترحى اننا نناقشها

بقترح تناقشو موضوعات حيويه شويه
يعني بتمسنا وبنشوفها في حياتنا
مثلا اطفال الشوارع
المشاكل الاجتماعيه اللي بقت كتير اوي اليومين دول
المشاكل النفسيه اللي بقت عادي وطبيعي نشوفها
الاعتداءات اللي بقت في كل مكان
مشاكل الناس البسيطه اللي محتاجه نحاول ونساهم في حلها
وطبعا مفيش مانع من الموضوعات الخفيفه والترفيهيه
بس مش معني كدا انها تقتصر علي النكت يعني
وكمان تحطو العاب جديده بدل اللي بئت كلها شبه بعض
كلها بنعد يا اما لحد خمسه يا اما لحد ما تخلص حروف الكلمه
يعني الموضوع بئي ممل شويه
كمان يبئي حلو جدا لو نتكلم عن شخصيات بارزه المفروض نتعلم منها
فنانين وسياسيين ومؤلفين
مش لازم احمد زويل يعني
مش عاوزين التكرار
والمعني من كل دا
ان يبئي في مساحه للابداع
.
.
اي اسئله تانيه
نحن في الخدمه

اكتر حاجه بتحاولى تخبيها عن عيون الناس ؟

ولا حاجه
بالعكس تماما انا بحب ابين عيوبي كلها
واللي يقرر يعرفني علي ما انا عليه
فدا كويس ولو لا فدي حريه شخصيه
علشان مبئاش بخدع حد
وبعدين انا مبحبش اخبي اي حاجه اصلا
لاني لما بخبي حاجه بحس انها غلط
وانا مبحبش الغلط
.
اي اسئله تانيه
نحن في الخودمه

طيب طالما اتكلمنا على السلبيات يبقى نتكلم على الايجابيات اية الاشياء اللى بتعجبك ؟

ايه يا جدعان هو كله دودة ما تشفوا حد تانى

دوده تجاوب على سؤال أ/Medhat
وبعدين نشوف حد تانى
واحنا فى انتظار ردها

اووووووووك
الايجابيات بئي او الحاجات اللي بحبها كتييييييييييييير جدا
يعني مثلا الاطفال بمووووووووت فيهم
كمان اي حاجه فيها ولو لمحه من الجمال
وطبعا زي ما بكره الكدب بحب الصدق والامانه
واكتر حاجه تعجبني وانا ماشيه في الشارع
اشوف الناس ماشيه مبتسمه وبتضحك
بتبئي حاجه جميله وتجيب تفاؤل بجد
كمان انا بحب الفنون بكل انواعها رسم نحت تصوير موسيقي
وكمان بحب الطبيعه والحيوانات
بحب دراستهم والفرجه عليهم ومعرفه سلوك حياتهم
كمان بحب الاصدقاء اللي بجد
يعني الاصحاب يبئي عندهم ولاء لبعض
وغير كدا كتييييييييييييييييير
يعني بحب اصحي بدري اتفرج علي منظر الشروق
ولازم ابئي في البلكونه وقت الغروب علشان بردو اتفرج عليه
ومش هقول بحب الهدؤ هلشان ساعات بحبه وساعات بحب العفرته
حيب الموود يعني
(موود) مش (مود)يا امينيم
عارفه اللي طولت عليكم وارفتكم
بس وانا مالي انتو اللي سالتو بحب ايه
.
وارشح اللي ييجي بعدي كيكي
ولا ايه رايكم

انا مقدرش ارفضلك طلب
انا معنديش مانع
وهاجهزه اشوف الاسئله

ميرسي يا كيكي علي زوئك دا
وادي يا ستي اول سؤال
.
.
يا ترا ايه هيا اكتر تجربه عصيبه عشتيها ؟

انا لاسه صغيره انى اقول كده
وفى حاجات كتير قولت عليها نفس الجمله
وبعدين لما تخلص اقول ايه العبط اللى قلته ده
الحياه لاسه طويله وطول ما الانسان عايش هيشوف الحلو والوحش
والصعب اوووووى والسهل
اهم حاجه ان الواحد يكون راضى

وينسى
عشان يقدر يكمل

بس اكتر حاجه انى كنت قدام قطه وليه عين مش موجوده
وانا كنت ببكى
هههههههههههههههههههه

موضوع: رد: كرسى الاعتراف السبت مارس 07, 2009 1:28 am

ايه الى يخليكى تيجى على نفسك علشان تسعدى غيرك؟؟

ما تجاوبى يا كي كي
و سؤالى :
هقول بس على شرط متزعليش منى : ايه رد فعلك لو اتشديتى لواحد وجه يكلمك ..

ايه يا كىكى انتى فين؟؟ لو مش هتقدر تتدخل على الموضوع وتبعيه قولى وياريت تنورينا فى اقرب وقت

لقد عدنا
ردى على سؤال امينيم
انا نادر لما اضحى بحاجه عشان حد
بس لما بيحصل بيكون الانسان ده غاالى جدااااا عندى
ولما اجى على نفسى يبقى هو اكيد قدام حاجات كتيره اوووى
وانه او انها تكون غاليه عندى
السؤال التانى مش فهماه

هاياجماعه لو محدش عنده اسئله ليا
يبقى نشوف عضو تانى ؟